Қазақстандағы студент жастардың эмоциялық әл-ауқаты: кросс-мәдени контекстегі әлеуметтік-психологиялық верификация

Аңдатпа

Бұл зерттеу полимәдени білім беру ортасында оқитын студенттердің эмоциялық реттелуінің кросс-мәдени ерекшеліктерін және олардың эмоциялық әл-ауқаттың қалыптасуындағы рөлін зерттеуге арналған. Зерттеудің мақсаты – қазақстандық және шетелдік студенттердің эмоциялық реттелу, эмоциялық өзіндік тиімділік, аффективті көріністер және қабылданатын әлеуметтік қолдау көрсеткіштері бойынша айырмашылықтарын анықтау, сондай-ақ аталған көрсеткіштердің эмоциялық әл-ауқатқа қосатын үлесін айқындау. Зерттеуге әл-Фараби атындағы Қазақ ұлттық университетінде білім алатын 212 респондент – қазақстандық және шетелдік студенттер қатысты. Диагностикалық құралдар ретінде стандартталған әдістемелер қолданылды: Дж. Гросс пен О. Джонның Эмоцияларды реттеу сауалнамасы (Emotion Regulation Questionnaire, ERQ), Позитивті және негативті аффект шкаласы (Positive and Negative Affect Schedule, PANAS), Эмоциялық өзіндік тиімділік шкаласы (Emotional Self-Efficacy Scale, ESES) және Қабылданатын әлеуметтік қолдаудың көпөлшемді шкаласы (Multidimensional Scale of Perceived Social Support, MSPSS). Деректерді статистикалық өңдеу IBM SPSS 26.0 бағдарламасында сипаттамалық статистика, салыстырмалы және корреляциялық талдау, сондай-ақ көптік регрессиялық талдау әдістерін қолдану арқылы жүргізілді. Нәтижелер позитивті аффект, негативті аффект және қабылданатын әлеуметтік қолдау эмоциялық әл-ауқаттың неғұрлым маңызды предикторлары болып табылатынын көрсетті (R² = 0,75; p < 0,001). Сонымен қатар когнитивті қайта бағалау мен эмоцияларды басу эмоциялық әл-ауқатқа статистикалық тұрғыдан маңызды тікелей үлес қосқан жоқ. Алынған нәтижелер мәдениетаралық білім беру ортасындағы студенттердің эмоциялық әл-ауқатының факторлары туралы түсініктерді кеңейтеді және психологиялық қолдау мен эмоциялық күйіп кетудің алдын алу бағдарламаларын әзірлеуде қолданылуы мүмкін.